Gutxieneko zerbitzuen aginduaren kontra joko dute sindikatuek

Eusko Jaurlaritzak martxoaren 29ko greba egunerako finkatu dituen gutxieneko zerbitzuen kontra helegitea aurkeztuko dute ELAk, LABek, EILASek eta ESK-k. Sindikatuek gehiegizkotzat jo dituzte ezarritako gutxienekoak, eta greba eskubidea mugatzea eta greba indargabetu nahi izatea egotzi diote Jaurlaritzari.

Prentsa ohar batean adierazi dutenez, gutxieneko zerbitzu horiekin, «gobernuak grebarako eskubidea eta lanerako eskubidea parekatu egiten ditu». Baina izatez ez ei dute maila bera, «grebarako eskubidea oinarrizko eskubide bat delako eta lanerako eskubidea eskubide konstituzional bat». Horregatik, uste dute Patxi Lopezen gobernuak grebaren eragina murriztu nahi duela.