Urtez urte markak hausten ari da Iberdrola, eta aurten ere bide berean da. Urtarriletik irailera 5.116 milioi euro irabazi ditu Bilboko argindar konpainiak, iaz aldi berean baino %16,6 gehiago, eta hobetu egin ditu aurtengo eginak zituen aurreikuspenak: ondo bidean, urtea amaitzerako 6.600 euroren mozkinak lortuko ditu. Iaz 5.530 milioikoa izan zen emaitza.
Ignacio Sanchez Galan presidenteak sinatutako oharrean, konpainiak azaldu du emaitza horiek Erresuma Batuan eta AEB Ameriketako Estatu Batuetan egindako inbertsioen ondorio direla. «Horri esker hobetu ditugu aurreikuspenak, eta akzioko 0,25 euroko dibidenduak banatu ahal izango ditugu gure sendotasun finantzarioa indartzen dugun bitartean».
Sanchez Galanek aipatutako inbertsio horiek 9.000 milioi eurokoak izan dira urteko lehen bederatzi hiletan, iaz baino %4 handiagoak; diru horren %60 baino gehiago Erresuma Batuan eta AEBetan erabili du, eta %55 sareetan inbertitu. Energia berriztagarriarekin lotutako inbertsio gehienak ere bi herrialde horietan egiten ari da Iberdrola.
Aurtengo 0,25 euroko dibidenduek ere aurreko markak hautsiko dituzte, iaz akzioko 0,23 eurokoak izan baitziren. Konpainiak aurreikusi du 1.700 milioi euro inguru banatuko dituela, eta horri, gainera, akziodunen batzarrean onartu beharko duten dibidendu osagarria gehituko zaio.
