Iberdrolak Brasilgo Neoenergia filialean duen partaidetza handitu du. Konpainiak akzioen %30 erosi dizkio Caixa de Previdencia dos Funcionarios do Banco do Brasili, 1.880 milioi euroren truke. Horri esker, enpresaren akziodun nagusi gisa sendotu da Iberdrola, haren akzioen %84ren jabe baita dagoeneko.
Iberdrolak sare elektrikoan aldeko apustua indartu nahi du, eta asmo horri begira erosi ditu akzio horiek. Izan ere, Neoenergia Brasilgo argindar banatzailerik handienetakoa da: 40 milioi herritarri banatzen die argindarra. Hurrengo urteetan hazkunde handia izatea aurreikusten du, sare elektrikoa berritu eta handitzeko egin beharreko inbertsioei esker. Gauzak horrela, konpainiak adierazi du operazio hori urrats bat gehiago dela sare elektrikoaren alde egindako apustuan.
Hain zuzen ere, Iberdrolak kapitala handitu zuen joan den uztailean, sare elektrikoetan inbertsioak handitzeko helburuz. Nagusiki Amerikako Estatu Batuetan eta Erresuma Batuan egin nahi ditu inbertsio horiek, bi herrialde horiek baitira gaur egun konpainiaren merkatu nagusiak. Brasil eta Espainia ere merkatu garrantzitsuak dira Iberdrolarentzat. Egoitza fiskala Bizkaian du konpainiak.
