Eraikuntzako langileek ezingo dute bakarrik lan egin, beroagatik alerta gorria edo laranja aktibatzen den egunetan. CCOO eta UGT sindikatuek eta Eraikuntzaren Espainiako Konferentziak sinaturiko protokoloko punturik deigarrienetakoa da hori. Egun horietan, halaber, ur gehiago eman beharko zaie langileei.
Sinatzaileen iritziz, protokolo hau «mugarri» bat da. Ondo bidean, Hego Euskal Herrian ere aplikatuko da, CCOOk eta UGTk bat eginda ordezkaritzaren gehiengoa baitute Bizkaiko, Arabako eta Nafarroako eraikuntzan. Neurri horiek beroagatik aktibaturiko alerta egoeren araberakoak dira; hala, alarma gorria edo laranja bada, langileak ezingo dira bakarrik gelditu lantokian. Erabakiaren oinarrian bero kolpe posible baten arriskua murriztea dago. Holakoetan, bero kolpea jasaten duenak konortea galdu ohi du, eta, hori gertatuz gero, langilea bakarrik ez egotea lortu nahi da.
Eta ohikoak al dira alerta egoerak? Bada, urrunago joan gabe, astearteko 13:00etan alerta laranja aktibatuko dute Erriberan. 39 gradu inguruko tenperaturak espero dira, eta gauerdira arte luzatuko da alerta. Sinatzaileen asmoa da protokoloa eraikuntza lan guztietara zabaltzea, baita aire zabalean egiten diren lanetara eta lan jardunaren ezaugarrienagatik estalpean egin ezin daitezkeenetara ere.
Debeku horrez gain, ura edateko tarte gehiago ezartzea arautu du protokoloak, eta hainbat gomendio egin; besteak beste, janari arinak egitea, lanorduak eguraldira egokitzea eta atseden gehiago egitea. Duela gutxi, LAB sindikatuak bere protokolo propioa aurkeztu zuen, eta atsedenak ere derrigorrezko izatea eskatu zuen.
