Ez da aldaketarik izan aurreikuspenetik behin-behineko datura, eta Nastatek berretsi egin du Nafarroako BPG barne produktu gordinak %2,1 egin duela gora uztailetik irailera artean, aurreko urteko epe berarekin alderatuz gero. Horrek esan nahi du hazkundea birritan apaldu dela aurten; hiru hamarren lehen hiruhilekoko %2,6tik bigarreneko %2,3ra, eta beste bi hamarren hirugarrenekora.
Eskaintzaren aldetik begiratuta barne produktu gordinaren bilakaerari, merkatuko zerbitzuen hazkundea (%3,4) da nabarmenena, eta bereziki garraioari, biltegiratzeari eta ostalaritzari lotutako zerbitzuak. Hala ere, zerbitzuek, orokorrean hartuta, aurreko hiruhilekoan baino hazkunde apalagoa izan dute (%2,7), bi hamarren jaitsi baitira.
Bigarren hiruhilekotik hirugarrenera hazkundea izan duten alorrak eraikuntza (%2,6) eta nekazaritza (%1,7) izan dira. Industriaren hazkundea, berriz, txikiagoa izan da bigarren hiruhilekoan baino: %0,1 hazi da, hots, hiru hamarren gutxiago.
Etxebizitzen gastua
BPGari eskariaren aldetik begiratuta, nabarmentzekoena da etxebizitzen gastuaren hazkundea %3,4an mantendu dela iazko datuaren aldean. Aldiz, gutxiago (%0,9) handitu da administrazio publikoen gastua: sei hamarren txikiagoa izan da bigarren hiruhilekoan baino.
Kapital eraketa gordina, berriz, zertxobait handitu da (%0,1), batez ere eraikuntzako eskariarengatik (%2,8).
Barne eskarian, esportazioek %1,6ko beherakada izan dute aurreko urtearekin alderatuz gero, eta inportazioak %2 apaldu dira. Kanpo eskaria, esportazioen eta inportazioen arteko aldea, positiboa da oraindik ere (%0,2).
Enpleguan %1,4ko hazkundea erregistratu du Nastatek hirugarren hiruhilekoan, eta eraikuntza izan da hazkunde handieneko alorra (%2,6).
