Nafarroako ekonomiak udan erritmoari eutsi dio. Uztailetik irailera, %0,6 handitu da jarduera, eta, bigarren hiruhilekoko datuarekin alderatuta, bi hamarren jaitsi da. Dena den, Nastatek aurreratutako urtearteko hazkunde datua hobea izan da: urtebetean %3 egin du gora jarduerak —bigarren hiruhilekoan %2,6koa izan zen hazkundea—.
Iragan astean, Laboral Kutxak jakinarazi zuen urte honetarako %2,1 haztea espero zutela, baina onartu zuten urte amaieran «beste lau hamarren» igo zitekeela. Aurkezpen hartan izan zen Jose Luis Arasti Ekonomia eta Ogasun kontseilaria, eta hark adierazi zuen %2,2ko hazkundea aurreikusten duela.
Nastaten arabera, batetik, industria eta zerbitzuen sektoreetako jardueraren ondorioz hobetu da datua. Bestetik, familien kontsumo gastuak bultzatu du gorantz barne eskaria.
