Uda honetako lehorteak ezinegona piztu du lehen sektorean: euri faltak ustiategietan gastu eta kalte handiak eragin dituzte, eta horiek arintzeko administrazioei laguntza eske aritu dira nekazariak eta abeltzainak azken hilabeteetan. Urriaren hasieran iragarri zuen Eusko Jaurlaritzak 4,9 milioi euro emango dizkiela diru laguntza zuzenen bidez; Nafarroako Gobernuak, berriz, gaur iragarri du bost milioi euro banatuko dituela.
Diru laguntzak ia 2.000 ustiategitara iritsiko direla aurreikusten du, eta abelburu bakoitzeko zortzi eta 50 euro arteko konpentsazioak emango ditu: hain zuzen, ardiak, ahuntzak, behiak eta zaldiak dituzten ustiategietako abeltzainek jasoko dituzte laguntza horiek.
«Hondamendi naturala»
Nafarroako Gobernuak Landa Garapeneko eta Ingurumeneko kontseilari Jose Mari Aierdik adierazi du lehortea inoiz ez bezalakoa izan dela, eta, ondorioz, abeltzainek lehenago erosi behar izan dutela neguan erosi ohi zuten bazka: «Ondorioz, prezioen gainkostuari aurre egin behar izan diote».
Nafarroako Gobernuak urriaren 7an «hondamendi natural» gisa sailkatu zuen lehortea. Gainera, parlamentuari eskatu dio alderdiek ahalik eta azkarren bozkatu dezatela lege proiektua, ustiategietara diru laguntzak urte amaierarako irits daitezen.
