Denborak eta eguneroko informazio oldeak apaldu egin dute Ormuzko itsasarteko krisiaren oihartzuna, baina gatazkaren ondorio kaltegarriak ez dira gutxitu. OCDE Ekonomia Lankidetza eta Garapenerako Erakundeak ohartarazi du itsasartearen blokeoa luzatzen bada munduko ekonomia batzuk atzeraldian sartuko direla.
Asiako zenbait herrialde eta Persiar golkokoak dira kolokan daudenak; lehenak, Ekialde Hurbileko petrolioaren dependentzia handia dutelako, eta azkenak, diru sarrera oparoak murriztu zaizkielako. Ez hori bakarrik: gatazka gaur bertan amaituko balitz ere, dirutza behar dute Iranek bonbardatu dizkien energia azpiegiturak konpontzeko.
OCDEk bi jokaleku irudikatu ditu. Interpretaziorik baikorrenean, zeinetan bakea laster iristen den Persiar golkoan, Ormuz zabalik, energiaren prezioak beherantz joango lirateke urtearen bigarren erdian. Ondorioz, munduko ekonomiaren hazkundea %2,8 litzateke 2026an, eta %3,1 2027an.
«Nahasmendu luzeagoko» jokaleku batean, hots, urte bukaeran ere ez balitz bake akordiorik egongo eta Ormuzek itxirik jarraituko balu, OCDEk erregaien eta ongarrien «eskasia nabarmena» izatea aurreikusten du, prezio handiagoak, finantzatze baldintza zurrunagoak eta konfiantza beherakada familietan eta enpresetan. Hala, urte honetan munduko barne produktu gordina soilik %2,1 haziko litzateke, eta 2027an, %1,8.
Bi jokalekuek iragartzen dituzten hazkundeak murritzak dira, kontuan hartzen bada ohikoa dela munduko ekonomia %3-%3,5 baino gehiago handitzera.
