Beste behin ere ozen entzun da Tubos Reunidoseko langileen haserrea Bilbon. Gaur goizean mobilizatu dira, eta erdiguneko zenbait kale moztu dituzte. Gaur amaituko da zuzendaritzak lana erregulatzeko aurkeztutako espedienterako kontsulta epea: Amurrioko (Araba) eta Trapagarango (Bizkaia) lantegietako 301 behargin kaleratu nahi dituzte.
Langileak goizeko zortzietan bildu dira Euskalduna jauregiaren inguruetan, bertan baitira enpresaren eta langileen ordezkarien arteko bilerak. Handik manifestazioan abiatu dira Sabino Arana etorbidean zehar EHUren Ingeniaritza Fakultateraino, eta berriro Euskalduna jauregira itzuli dira. Ibilbidean, hainbat tokitan eserialdiak egin dituzte, eta horrek eragina izan du trafikoan. Zirkulazioa eten dute Zunzunegi etorbidean eta Jesusen Bihotza plazan, besteak beste. Mobilizazio hori amaitu ondoren, beste manifestazio bat egin dute Euskalduna jauregitik SPRI enpresen garapenerako agentzia publikoraino, bidean Eusko Jaurlaritzaren egoitzaren aurretik igarota.
Tubos Reunidosek altzairuzko hodi bereziak ekoizten ditu, batez ere energiaren sektorerako. Egoera ekonomiko zailean da, besteak beste sektoreko eskariaren gorabeherengatik, energia kostuen igoeragatik, AEBetako muga zergengatik eta nazioarteko lehia handiarengatik. Testuinguru horretan planteatu du erregulazio espedientea, egitura eta jarduera egokitzeko neurri gisa.
Ikusi gehiago
Amurrioko eta Trapagarango 301 langileri eragingo lieke neurriak: 214 finkori eta 87 behin-behinekori. Azken bileretan, zuzendaritzak hobetu egin du bere proposamena: kaleratutako langileei 38 eguneko soldata eskaini die, eta lan urte bakoitzeko 1.500 euroko ordain gehigarri bat, hamar urteko muga jarrita. Erretiro aurreratua hartzeko adina ere jaitsi dute, 60 urtetik 59 urtera, soldata gordinaren %65 jasota. Baina 301 langile kaleratzeko asmoari eutsi egiten dio enpresak.
Sindikatuek ez dute onartu eskaintza, eta berretsi dute ez dutela kaleratzerik sinatuko. Beste erregulazio handi batzuetako aurrekariei erreparatuta, enpresek azken bilerak izan arte itxaroten dute kaleratze kopurua murrizteko.
Negoziazioak otsailaren 17an hasi ziren, eta lan erregulazioen araudiak dio gutxienez 30 egun natural iraun behar duela.
EAJren eskaera Kongresuan
Gaur, EAJk legez besteko proposamen bat aurkeztu du Espainiako Kongresuan, SEPI erakunde publikoak Tubos Reunidosekin duen zorra berregitura dezala eskatzeko. Hodi ekoizleak 71 milioi euroren galerak izan zituen iaz, eta gaur egun 260 milioi eurotik gorako zorra du; horren erdia Espainiako Gobernuarekin dauka, zehazki SEPI erakunde publikoarekin. EAJren ustez, funtsezkoa da hori egitea, enpresaren bideragarritasuna bermatzeko.
Horrekin batera, siderurgia sektorearentzat neurri orokorragoak ere eskatu ditu EAJk, batez ere energia kostuak murrizteko —besteak beste, argindarraren gaineko zergak eta bide sariak gutxitzea—, industriaren lehiakortasuna hobetzeko.
