Urriko iragarpenak hobetu ditu NDFk, eurogunean izan ezik

Nazioarteko Diru Funtsak (NDF) aurtengorako aurreikuspenak hobetu ditu, eta munduko ekonomia %3,1 haztea espero du, urrian iragarri baino 0,2 puntu gehiago. Era berean, inflazioa «espero baino bizkorrago» apaltzen ari dela onartu du, eta 2025erako kontrolpean izango dela. Dena, baina, ez da pagotxa, euroguneari dagokionez urte hasierako iragarpenak urrikoak baino txarragoak baitira: BPGa %1,2 igoko zela iragarri zuen ordukoan, eta %0,9 orain, «2023ko emaitzak espero baino txarragoak izan zirelako».

Urtarrilero bezala, NDFk erradiografia egin dio munduko ekonomiari, eta aurten izango duen bilakaera iragarri du. Iazko urrian aurrerapen bat egin zuen, eta orain hobetu egin du, funtsaren ustez munduko ekonomia «harrigarriki erresilientea» delako. 2022an goia jo ostean, inflazioa «espero baino bizkorrago» jaisten ari da, eta eragin txikia izan du enpleguan eta jardun ekonomikoan. Dena den, inflazioa baretzeko harturiko neurriek eta interes tasa handiek 2024ko hazkundea apaldu dezaketela uste du.

Munduko ekonomia %3,1 haziko da aurten, eta %3,2 2025ean, baina batezbesteko historikoa baino txikiagoa (%3,8). Inflazioari dagokionez, 2024an %5,8ra jaistea espero du —%2,4 «ekonomia garatuetan»—, eta %4,4ra 2025ean. Alde horretatik, NDFk uste du estatuek «inflazioaren aroaren amaiera» behar bezala kudeatzearen erronka dutela mahai gainean, eta dirua bildu behar dutela «gastu lehentasun berrientzat» eta zor publikoa murrizteko.

Zonakako entresaka eginda, iragarpen apalenetakoak eurogunekoak dira. Bertan da Euskal Herria, eta baita haren esportazioen bezero handienak ere: Alemania (%0,5), Frantzia (%0,8) eta Espainia (%1,5). 2025erako, aldiz, %1,7ko hazkundea izatea espero du.

Munduko beste eremu batzuei dagokienez, %2,1eko hazkundea espero du AEBetan; %0,6koa Erresuma Batuan;%0,9koa Japonian; %4,6koa Txinan; %2,6koa Errusian; eta %1,4koa Brasilen.