Suitzak ez dio mugarik ezarriko hazkunde demografikoari. Erreferendum batean bozkatu zuten atzo SVP Suitzako Alderdi Popularra eskuindarrak biztanleria hamar milioi herritarrera mugatzeko proposamenari buruz, eta ezezkoak irabazi zuen: bozkatzaileen %55ek kontra bozkatu zuten.
Ekinaldia aurkeztu zuenean, duela hilabete batzuk, SVPk argudiatu zuen «kontrolik gabeko immigrazioak» kalteak eragiten dituela etxebizitza arloan, garraioan, osasungintzan, eta hezkuntzan, besteak beste. Bederatzi milioi biztanle baino gehixeago ditu herrialdeak, eta, alderdi horren esanetan, biztanleria «azkarregi» ugaritzen ari da.
Europa mendebaldean hazkunde demografikorik handienetakoa eduki duten herrialdeetako bat da Suitza. 2002an 7,3 milioi biztanle zituen, eta gaur egun 9,1 milioi; hau da, ia 25 urtean %25 handitu da biztanleria. Lau biztanletik batek (%27) ez dauka Suitzako nazionalitatea.
Baiezkoak irabazi izan balu, herrialdearen eta EB Europako Batasunaren zirkulazioko aske akordioari eragingo ziokeen —2002an sartu zen indarrean—. Herrialdeko patronalik handienak eta alderdi gehienek SVPren proposamenaren kontra egin dute.
