Frantziako Asanbleak urtarrilean ontzat eman zuen debeku proposamena berretsi dute Senatuan: 15 urtetik beherako haurrek laster ez dute sare sozialak erabiltzeko baimenik izanen. Hasierako lege proposamenari ñabardura bat ekarri diote: bereizi dituzte «ongizate fisiko, mental edo moralari» eragin diezaioketen sare sozialak, eta besteak. Lege testu berria Europako Batasuneko zuzenbidearen kontra doan beldur, Europako Batzordeari dei egin dio Frantziako Gobernuak.
Atzo gauean bozkatu zuten senatariek, baina ez zuten osoki egin gobernuak proposatutakoaren alde. Diputatuek urtarrilean bozkaturiko lege proposamen macronistan, orduan, debeku zabala aurreikusten zuten; horrela, «heldutasun digitala» ezarriko zuten lehen herrien artean izanen zen Frantzia. Haatik, ñabardura bat gehitu dio Senatuak lege testuari, plataformak bi motatan bereizirik, ekar lezaketen lanjerraren arabera.
Alde batetik, plataformarik lanjerosenak ezarri dituzte, ongizateari eragin diezaioketenaren arabera sailkatuak, eta, bestetik, librekiago erabilgarriak geratuko liratekeenak, guraso baten baimenarekin, dena den.
Ondoko urratsa, beraz, Europako Batzordearen iritzia biltzea izanen da, «hiru hilabeteko epean». Ondotik, diputatu eta senatariak bilduko dira lege testuaren azkeneko bertsioaren adosteko, eta delako lege testua berriz bozkatu beharko dute bietan, Asanblean eta Senatuan.
Neurriaren legezkotasuna
Joan den urtarrilean Frantziako Asanblean izandako eztabaidetan, jadanik behin baino gehiagotan jarri zuten zalantzan halako neurri baten legezkotasuna. Garai hartan egindako adierazpenetan, Thomas Regnier Europako Batzordeko bozeramaileak erran zuen Frantziako agintariek eskubidea dutela «herritarrei» aplikatuko litzaiekeen heldutasun digital bat ezartzeko. «Sareetako plataformak behartuak dira lege nazionalak betetzera. Baina Europako Batzordearen ahalmen berezia da halako neurri bat aplikagarria dela egiaztatzea eta plataformek adina egiaztatzeko tresna egokiak jarri dituztela behatzea».
Urtarrilean bultzatu zuen legea Emmanuel Macron Frantziako presidenteak. Heldu den irailerako sare sozialetako kontu bat irekitzea galarazi nahi diete txikienei, eta 2027. urtearen hasierarako erabiltzaile guzien adina egiaztatzeko sistema eraginkor bat martxan jartzea da helburua. Haurrak eta nerabeak «pantailetatik babestu» nahi dituzte, urtarrilean adierazi zutenez, eta, bereziki, sarean diren «eduki kaltegarri batzuetatik». Sare sozialetako sarbidea debekatzeko ez ezik, ikastetxean sakelako telefonoak erabiltzeko debekua ere sartu dute lege proposamenean.
Urtarrileko bozketan, lege proiektuak aldeko 130 boto, kontrako 21 eta sei abstentzio izan zituen. Frantzia Intsumisoko diputatuak dira nagusiki neurriaren kontra agertu direnak. Frantzia aitzin, Australiak ere hartu zuen gisa bereko neurri bat, orain dela zenbait hilabete.
