Suhiltzaileek oraindik ez dute lortu Oresen (Espainia) asteazkenean piztu zen sutea kontrolatzea. Dagoeneko 15.400 hektarea erre dira, eta haizea eta ezaugarri topografikoak ez dira laguntzen ari garrak baretzen. Sutetik ez dago oso urrun Petilla Aragoi (Nafarroa), eta herriko bizilagunei etxetik ateratzeko esan zieten atzo, badaezpada ere, eta hustuta jarraitzen du herriak.
Udalerriko bizilagunek etxera joateko aukera izan dute gaur goizean, beharrezko gauzak eta sendagaiak hartzeko, baina berriz ere martxa egin behar izan dute. Foruzaingoa ari da herrigunerako sarbidea kontrolatzen.
Sutea piztuta dago oraindik, eta egoera ez da egonkorra. SOS Nafarroak alerta egoera du indarrean: baliteke arratsaldean egoerak okerrera egitea, haizea hego eta hego-mendebaldera alda daitekeelako. Nafarroako suhiltzaileak sua itzaltzeko lanean ari dira Petillatik hurbilen dagoen gunean. Zehazki, Cordovillako, Zangozako eta Tafallako suhiltzaileak dabiltza han, baita Nafarroako Gobernuko basozainak, helikoptero bat eta bi hegazkin ere.
