Datorren urteko festei begiratzeko eginkizuna zuen atzo Sanferminetako Mahaiak, Iruñean. Jaiak ospatzearen alde azaldu, kontra egin, edo, behintzat, mesfidati agertu; horra duda, pandemiak eztanda egin zuenetik. Azkenik, iuntzean atera zen argitara bilkuran ondorioztatutakoa: 2022ko sanferminak egitearen alde azaldu da Iruñeko Udala. Halere, neurriak uztailean Nafarroan den egoerara egokituak izanen dira, argitu dutenez.
Iruñeko Udalak jakinarazi du sanferminen aldeko «apustu sendoa» egitea dela asmoa, eta, hain zuzen, ere, jaiak antolatzera bideratuko den aurrekontuan ere nabarituko da jarrera hori, diru gehiago erabiliko baitute. «Aurrekontua handiagoa izan liteke, aintzat hartu behar baita jai hauek hiriko esparru guztietan duten garrantzia zenbaterainokoa den. Bai aisiari eta kulturari begira, baita herritarrengan pizten duten ilusioari eta duten eragin ekonomikoari erreparatuta ere».
Iruñeko alkate Enrique Maia da Sanferminetako Mahaiaren buru. Batzarraren ondotik egindako adierazpenetan adierazi zuen 2022ko sanferminak «aukera berri baten» modura ulertu behar direla, eta «etorkizuna markatuko duten garai berri baten estreinakoak» balira bezala ikusi.
