2022ko abenduan labankadaz hil zuten Lukas Agirre, Donostian. 24 urteko hernaniarra hilda topatu zuen Ertzaintzak Eguberri eguneko goizean, Donostian. Ortziralean hasi zen epaiketa —epaimahaia eratu zuten—, eta ekainaren 1era arte iraunen du. Saioa hasi aitzinetik fiskaltzak aurreratu duenez, gaur aurkeztuko dituzte aldeek beren txostenak, eta gero hasiko dira deklarazioak. Akusatuak, azkenik, deklaratzeko eskubideaz baliatuko dira; eta, hortaz, Ertzaintza izanen da deklaratzen lehenbizikoa.
Hiru lagun epaituko dituzte. Haietako birendako 22 urteko kartzela zigorra eskatu du Gipuzkoako Fiskaltzak; «giza hilketa» leporatzen diote bati, eta «ezinbesteko laguntzaile» izatea bertzeari. Hirugarrenarendako hiru urteko zigorra eskatu du fiskaltzak, «estaltzaile» izatea egotzita. Kartzela zigorrez gain, fiskaltzak kalte ordainak eskatzen dizkie lehenbiziko biei: guztira 280.000 euro. Lukas Agirre zenaren familiako kideak, berriz, akusazio partikular gisa aurkeztuko dira, eta horiek zigor handiagoak eskatu dituzte: 25 urtekoa lehenbiziko bi akusatuendako, eta hiru urtekoa «estaltzaile» izatea leporatzen diotenarendako.
Izan ere, fiskaltzaren txostenaren arabera, Agirrek eta hiru akusatuek Victoria Cafe diskotekan egin zuten topo, eta kanpoan «eztabaida» bat izan zuten. Ondoren, «laguntzaile» izatea leporatzen dioten mutilak labana bat eman zion «hilketa» egozten dioten akusatuari, betiere fiskaltzaren kontakizunaren arabera; azkenean, «bakeak egin» zituzten, eta Okendo plazaren bertze alderantz abiatu ziren.
Bitarte horretan «tentsioak gora» egin zuen, eta orduan, «bat-batean eta inork espero gabe», akusatuetako batek labankada eman zizkion Agirreri gorputzeko ezkerreko aldean eta lepoan, eta «biktimak bere burua defendatzeko zuen aukera oro baztertu». «Hildakoaren bizitza amaiarazteko asmoz aritu zen une oro, aurretik bien arteko liskarrik gertatu gabe». Are, fiskaltzak zera nabarmendu du, bigarren akusatuak lehenbizikoari ustez labana eman zionean «guztiz jakitun» zela zein ziren haren asmoak. Hirugarren akusatuak, berriz, labana «bota» zuen, eta ikerketa oztopatu, fiskaltzaren arabera.
Poliziak 06:20 aldera izan zuen erasoaren berri, eta gaztea Okendo plazan aurkitu zuen, Victoria Cafe diskotekatik gertu. Sastakadak zituen lepoan eta gorputzaren bertze zenbait ataletan. Larrialdi zerbitzuak hura suspertzen saiatu ziren, baina ez zuten lortu.
Oroimen plaka
Hilketaz geroztik zenbait elkarretaratze egin dituzte hiriburuko Okendo plazan. Haren memoria bizirik mantentzeko, ordea, bertze pauso bat emateko eskatu zioten 2023an Donostiako Udalari: plaka bat jartzea nahi dute Okendo plazan.
Salatu zutenez, lehen eskaerari ezezkoa eman zion udalak, «modu ankerrean». Beste eskaera bat tramitatu zuten orduan, eta sinadura bilketa bat ere hasi.
