29 urteko gizon bat atxilotu dute Barakaldon (Bizkaia), indarkeria matxista leporatuta. Eusko Jaurlaritzako Segurtasun Sailak jakinarazi duenez, emakume bat aurkitu zuten astelehenean Muskizen, atxilotuaren bikotekidea, kalean zaurituta, eta ospitalera eraman zuten. Biktimak salaketa aurkeztu zuen, eta gizona atxilo eraman zuen Ertzaintzak, emakumeari tratu txar jarraituak ematea egotzita.
Azaldu dutenez, biktimak atxilotuarekin bizi zen bitartean jasan zituen tratu txarrak, behin baino gehiagotan. El Correo egunkariak plazaratutako informazioaren arabera, atxilotutako gizonaren mehatxuak, erasoak eta umiliazioak jasan zituen emakumeak. Hedabide horrek zehaztu duenez, emakumea Muskizko kale batean aurkitu zuten zaurituta —irain matxista bat zuen idatzia bizkarrean, kuter batez urratua, eta erredurak ere bazituen—, eta ospitalera eraman zuten. Salaketa aurkeztu ostean atxilotu zuten gizona, baina epaitegiak aske utzi zuen, kautelazko neurriekin.
