Eusko Jaurlaritzako Gobernu Kontseiluak onartu du 36,1 milioi euro bideratzea itunpeko ikastetxeetan hezkuntza premia bereziak dituzten ikasleentzako unitateak sortzeko. Arabako, Bizkaiko eta Gipuzkoako itunpeko eskolek zehaztu beharko dute zein unitate itundu nahi dituzten Lehen Hezkuntza eta Derrigorrezko Bigarren Hezkuntza berezi irekian; berariazko hezkuntza errefortzuko proiektuetan; eta curriculum aniztasunaren bidez ikaskuntza eta errendimendua hobetzeko programetan.
«Deialdi honen bidez, itunpeko ikastetxeetan Lehen Hezkuntzan eta DBHn ari diren eta hezkuntza premia bereziak dituzten ikasleei arreta emateko beharrezko diren profesionalak finantzatzen ditu Hezkuntza Sailak«, ziurtatu du Cristina Uriarte Eusko Jaurlaritzako Hezkuntza sailburuak. Azaldu duenez, aurtengo ikasturtean 491 gela itundu dira hezkuntza berezi irekian. «Unitate horietan, orotara, pedagogia terapeutikoko 491 irakasleren lana finantzatu du Hezkuntza Sailak», nabarmendu du sailburuak. Gainera, berariazko hezkuntza errefortzuko 73 proiektu itundu dituzte, baita curriculum aniztasunaren bidez ikaskuntza eta errendimendua hobetzeko 59 programa ere. Azpimarratu du programa horietan hezkuntzako 132 profesional aritu direla lanean.
