Bi motor istripu larri gertatu dira azken orduetan Euskal Herriko errepideetan. Goizaldean, 54 urteko gizonezko bat hil da GI-368 errepidetik aterata, Lezo inguruan. Gasteizen, 57 urteko gizonezko bat zendu da eguerdian, Gaztelako Atea kalean, bihurgune batean ibilgailuaren kontrola galdu ostean.
Arabako hiriburuan, Juan Jose Nanclares zubi urdinaren azpiko bihurgunean gertatu da ezbeharra, 13:00ak pasatxoan. Gaztelako Atea kalea eta Elvira Zulueta kalea elkartzen diren tokian gertatu da istripua. Gidariak motorraren kontrola galdu du, eta semaforo baten kontra jo. Kolpea oso bortitza izan da, eta bertaratu diren osasun zerbitzuetako langileek ezin izan dute ezer egin, Efe albiste agentziaren arabera.
Gasteizko Udaltzaingoak bere gain hartu du ikerketa. Istripua gertatu denean, oinezko asko zeuden inguruan.
Lezoko istripua
54 urteko motor gidari bat hil da gauean, 03:00ak jo baino lehentxeago. Eusko Jaurlaritzaren Segurtasun Sailak jakinarazi duenez, GI-636 errepidean gertatu da ezbeharra, Lezo inguruan, Papresaren lantokiaren parean, Errenteriarako norabidean. Motorra errepidetik atera da; oraindik ez dakite zergatik.
Gidaria hil egin da erorikoak eragindako lesioen ondorioz. Bertaratutako osasun zerbitzuetako langileek egiaztatu dute heriotza. Ertzaintzak ikerketa abiatu du istripuan zer gertatu den argitzeko.
