Auto baten eta bizikleta baten arteko istripua izan da gaur goizean Forondatik gertu (Araba), A-4306 errepideko biribilgune batean. Istripuaren ondorioz, 69 urteko txirrindulari bat hil da.
Eusko Jaurlaritzako Segurtasun Sailak jakinarazi du istripua 08:50 aldera gertatu dela. Herritar batek SOS Deiak zerbitzura deitu du, istripuaren berri emateko. Poliziak eta Osakidetzaren anbulantzia bat bertaratu dira. Txirrindularia hilda zegoen.
Ertzaintzak ikerketa abiatu du argitzeko istripua zergatik gertatu den.
