Ahern Euskal Herrian izan da hainbatetan, Espainiako Gobernuaren «baimenarekin»

Bertie Ahern Irlandako lehen ministro ohiak esan du iaz eta aurten hainbat aldiz egon dela Euskal Herrian, Donostian zehazki, gatazkaren bukaera aztertzen, Espainiako Gobernuak horretarako «baimena» emanda. The Irish Times egunkariari emandako elkarrizketan jakinarazi du hori. Euskal Herrian egindako lanen xehetasunik ez du eman, hala ere. «Azkeneko urteetan honetan lan asko egin izan dut, eta gauza asko isilik egin behar dira». Irlanda iparraldeko bake prozesuaren garaian izan zen Irlandako lehen ministro Ahern. Duela hiru urtetik Munduko Foro Ekonomikoko lan talde bateko kidea da, eta gatazken konponbideen bila dihardu.