Otsailean atxilotu zituzten Aitor Zelaia eta Galder Barbado gazteak, biak arabarrak. Amurrion (Araba) atxilotu zuten bata, eta Gasteizen bestea. Atxiloketen ondotik, gazteak espetxeratzeko agindua eman zuen Maria Tardon Espainiako Auzitegi Nazionaleko epaileak. Madrilgo Soto del Realgo espetxean egon ziren hasieran, bakartuta. Martxoan, ordea, Zaragozako Darokako espetxera lekualdatu zituzten gazteak.
Hala Bedi irratiak jakinarazi duenez, Aitor Zelaia gasteiztarra baldintzapean aske utzi dute, epaiketa egin bitartean. Horretarako, baina, 6.000 euroko bermea ordaindu behar izan dute senideek. Galder Barbado gazteak espetxean jarraituko du, oraingoz.
Berri agentziek atxiloketen garaian jakinarazi zutenez, "substantzia leherkorrak, sukoiak edo su eragileak" edukitzea egotzi zien Maria Tardon epaileak. Espetxeratze horien abiapuntuan 2014. eta 2015. urteetan gertatutako zenbait eraso daudela jakinarazi zuten.
Ertzaintzak "piroteknia materiala" zeukan biltegi bat aurkitu zuen Duran (Araba), eta, esan zutenez, bi gazte horien hatz markak agertu ziren material hori gordetzeko zuten bidoi batean. Bien etxebizitzak miatu zituzten, eta beste bat ere bai Amurrioko Delika auzoan.
