Alokairu kontratua amaituta, kalera. Halako egoerak gero eta ohikoagoak dira Donostian, Kaleratzeak Stop plataformak salatu duenez. Kolektibo horrek elkarretaratzea egin du gaur Bulebarreko kioskoan, eta hamahiru familiaren kasuak azaldu. Protestan parte hartu dute EH Bildu, Elkarrekin Podemos, Ezker Anitza eta EPK alderdietako zenbait kidek ere.
Plataformak esplikatu duenez, Donostiako hamahiru familia horiei amaitu zaie jada alokairu kontratuaren iraunaldia, eta baita Etxebizitza Legeak tentsio handiko eremuetan aplikatzen duen ezohiko luzapena ere. Horiek horrela, etxejabeak hasiak dira kaleratze aginduak bidaltzen. «Kontratu amaierek eragindako etxegabetzeen tsunami bat datorkigu», ohartarazi dute gaurko agerraldian.
Are: plataformako ordezkarien ustez, egoerak okerrera eginen du «administrazioek premiaz eta ausardiaz jokatzen ez badute»: aurten 26.000 kontratu inguru amaituko dira Gipuzkoan, eta 90.000 inguru Euskal Autonomia Erkidegoan.
Hori dela eta, alokairu sozialerako etxebizitza publikoen parkea handitzea galdegin diote Eusko Jaurlaritzari. Izan ere, plataformaren arabera, Araba, Bizkai eta Gipuzkoan oro har 100.000tik gora dira etxebizitza publikoen eskatzaileen erregistroan izena emanda daudenak: «Jaurlaritzak 25.000 etxebizitza publiko ditu eskari hori asetzeko. Ez da aski, inondik inora ere».
