Iazko martxoaren 5ean, Realak eta PSGk jokatutako furbol partidaren atarian, Ertzaintzaren foam bala batek larri zauritu zuen Amaya Zabarte buruan, Anoeta inguruetan; gero, lurrean zela, ertzain batek ostikoa jo ziola ere salatu dute. Gaur, eraso horrekin loturik dauden zazpi ertzainek deklarazioak egin dituzte Donostiako Epaitegian: bost, ikertu gisa, eta beste biak, lekuko gisa. Bi horiek Iker Sarriegi abokatuaren galderak erantzun dituzte; ikertuek uko egin diote erantzuteari.
Eta erantzunen horien arabera, jakin ahal izan da Anoetako operaziorako, ertzainek galarazita zutela SIR-X foam balak erabiltzea; ikergai diren gertaerak jazo baino ordubete lehenago iritsi zen agindua. SIR balak baino kalte handiagoak eragin ditzakete SIR-X motakoek, eta zuzendaritzak erabaki zuen Anoeta inguruetarako ez zirela egokiak. Hala ere, Ertzaintzak egindako oldarraldiaren osteko txostenetan azaltzen da hiru SIR-X falta zirela, erabili behar ez ziren balak alegia. Foam horiekin zer gertatu zen galdetuta, ertzainen erantzuna izan da «poltsatik erori» egin zitzaizkiela; hau da, «galdu» egin zirela Anoeta inguruan.
Bi agentek egin zuten tiro Amaya Zabarte buruan larri zauriturik utzi zuen oldarraldian. Irudiei eta Ertzaintzak berak egindako txostenei jarraikiz, Sarriegi abokatuak ziurtatu du Zabarte zauritu zuen balaren jautitzailea nor den jakitea ez dela zaila, hain zuzen, SIR-X bala bat «galdu» zuten bi ertzainetako bat litzatekeela. Operazioen ostean, ertzain bakoitzak zenbat eta zer motako foam bala bota dituen jasotzen da, izan ere.
Zabarte betiko zauriturik utzi duen erasotzailea ezagutzeko aurrerapauso bat eman dezake gaurko jardunak, Donostiako epaitegian, baina Sarriegik uste du, Xuhar Pazosen auziarekin gertatu den antzera, Ana Isabel Perez Asenjo epailea gai dela «edozein momentuan» Zabarte auzia artxibatzeko, «bai eta lekuko garrantzitsu baten deklarazioa hartu gabe ere». Zabarte, lurrean zauriturik ikusi ondoren, hura lagundu zuen emakume bati erreparatu dio abokatuak, modu horretan. Hura ere lekukoa da, baina oraingoz ez dute deitu deklaratzera.
Aurpegia kaputxarik gabe
Ertzainek testigatzak ematen hasi aurretik, Zabarteren senar Joseba Novoak adierazpenak egin ditu, eta argi eta garbi esan du ertzainek zer aurpegi duten jakin nahi duelako joan dela epaitegira. «Tiro egin zuenak hitz egin behar du», esan du Novoak. «Zer aurpegi duen jakin nahi dut, haiek badakite-eta nik zer aurpegi dudan; beraz, ez daitezela ezkutatu kaputxa batekin».
Gaur elkarreratzera deitu dute Ertzaintzako sindikatu batzuek, polizien aurkako erasoek gora egin dutela ziurtatuta, eta, protesta horren harira, Novoak esan du indarkeria «gaitzetsi» egiten duela, ez dela bidea, baina «pena» eman diola Ertzaintzaren sindikatu horiek, «lankideen arduradun gisa», ez direla gai izan «gaitzesteko» haren emazteari emandako «ostikoa».
Zabarteren senarrak gogoratu du egun hartan hiru emakume zauritu zituztela Ertzaintzaren oldarraldi batean: «Burura egin zieten tiro» foam balekin. Horregatik, eskatu die Ertzaintzako sindikatuei «gizartearen ondoan jartzeko une batez». Ez du egin Ertzaintzaren protokoloak aldatzeko eskaera, «baizik eta ertzainek gizartearekin duten jarrera» aldatzekoa.
Era berean, Ertzaintzaren Barne Gaietarako Sailaren aurka aritu da Novoa. «Manipulatzen eta gezurrak esaten jarraitzen dute», esan du. «Hau dena zera da, ezkutatu eta gezurrak esan une oro, egun hartan gaizki egindakoa aitor beharrean. Jardun ziren moduak huts egin zuen, eta esan beharko lukete neurriak hartuko dituztela». Erantsi du hor daudela gertaerak, nahiz eta «estali» nahi izan dituzten: «Irudiak hor daude».
Bestalde, Zabarte auziaren ikerketa judiziala orain arte «izugarri txarra» izan dela helarazi du, eta «lekuko nagusiak» oraindik ez duela deklaratu. Hark lagundu zuen Zabarte, lurrean ikusi zuenean, zauriturik. Era berean, ziurtatu du Ana Isabel Perez Asenjo epailea Zabarte auzia artxibatzen saiatuko dela. Izan ere, epaile horrek artxibatu egin zuen lehen salaketa, deklarazioak hartu gabe, eta ikerketarik egin gabe. Gipuzkoako Probintzia Auzitegiak, ordea, auzia berriro zabaltzeko agindu zion.
