2010eko urtarrilaren 26an Ertzaintzak Ondarroan hasitako operazioa du abiapuntu Zenonen aurkako auziak. ETArekin lotura izatea egotzita, bederatzi pertsona atxilotu zituen Ertzaintzak. Inkomunikatuta eduki zituen, eta, espetxean inkomunikazioa kendu zietenean, abokatuari kontatu zioten ertzainek torturatu egin zituztela. Jendaurrean salatu zuen hori abokatuak, atxilotuen senideekin egindako agerraldian. Kontatu zuen Ertzaintzak atxilotuak torturatu zituela, eta Herrizaingo sailburua egin zuen erantzule: Rodolfo Ares.
Aresek Zenonen aurkako kereila aurkeztu zuen. Bilboko Epaitegiak otsailean epaitu zuen abokatua, eta martxoan zigortu. 11.480 euro eta auziak eragindako kostuak ordaintzera zigortu zuen: Aresi 5.000 euro ematera, hemezortzi hilabetez eguneko hamabi euro ordaintzera eta gastuak pagatzera. Aresen aurka kalumniak nahita eta jendaurrean egitea egotzi zion. "Inputazio faltsuak" egitea faltsuak direla jakinda eta "egiari ausarkeriaz mespretxu egitea".
Zenonek helegitea aurkeztu zuen erabakiaren kontra. Mamian sartu gabe, epaileak ebatzi du auzian epaitutakoak preskribatuta daudela.
