Ertzaintzak astearte arratsaldean atxilotu zituen hiru gazte, azaroaren 30ean EHUko ikasle batek salatutako erasoarekin lotuta. Gaur utzi dituzte aske azkenengo biak —20 eta 21 urte dituzte—, epailearen aurretik pasatu ondoren. Lesio eta gorroto delituak egotzi dizkiete, eta epaileak debekatu egin die biktimarengana eta EHUren Arabako campusera hurbiltzea. Bietako inor ez da unibertsitateko ikaslea. Batek aurrekariak ditu "futbolzale erradikalekin" izandako istiluengatik
Asteazken goizerako askatu zuten hirugarren atxilotua. Halako neurririk ez diote jarri hari, baina epailearen aurrera joan beharko du hark deitzen dionean.
Letren Fakultateko 19 urteko ikasle batek salatu zuen erasoa. Azaldu zuenez, bilera batetik irteten ari zela, aurpegia estalita zeramaten bi pertsonek kolpeak eman zizkioten, eta ikaslea ospitalera eraman behar izan zuten. Ebakuntza egin zioten, hautsiak baitzituen masailezurra eta sudurra. Salaketaren berri izan eta biharamunean, joan den ostegunean, Nekane Balluerka EHUko errektoreak gaitzetsi egin zuen erasoa, eta oroitarazi zuen EHUn ez dela inolako biolentziarik onartzen. Gainera, erasoa salatzeko elkarretaratzea egin zuten astelehenean.
