Bizkaiko Probintzia Auzitegiak 11 pertsonaren aurkako epaiketa hasi du gaur, Ekain Perrino gaztearen aurkako eraso homofoboaren harira. Perrinok 23 urte zituen, 2021eko ekainaren 6ko gauean erasoa jaso zuenean, Basaurin (Bizkaia). Epaiketa lau jardunetan egingo dute, eta akusatuek asteazkenean deklaratuko dute.
Akusazioak hiru urteko kartzela zigorra eskatu du erasoan parte hartutako pertsona bakoitzarentzat, gorroto delitu bat tarteko zauriak eragin zizkiotelako Perrinori. Halaber, urruntze agindua ere eskatu du ustezko erasotzaileen aurka, bost urteko tarte batean biktimarena hurbildu ez daitezen 500 metro baino gutxiagora. Gainera, 6.000 euroko kalte-ordaina ere eskatu du akusazioak, kalte morala asebetetzeko.
Eraso homofoboa 2021eko ekainaren 6an izan zen, larunbatez, 02:30ean. Perrino lagun batzuekin, Basauriko Bizkotxalde plazan zegoen, eta beste gazte bat iraintzen hasi zitzaion, eta gero irainak kolpe bilakatu ziren. 11 gizonen artean jipoitu zuten azkenean, «marikoi zikina» eta bestelakoak oihukatzen ari zirela, eta konorterik gabe utzi zuten. Erasotzaileek ihes egin zuten, baina Poliziak handik ordu gutxira atxilotu zituen.
«Erantzun egin behar da»
Erasoa gertatu eta egun gutxira, milaka pertsona batu ziren Basaurin, herriko gazteak jasandako erasoaren aurkako manifestazioan. Euskal Herriko hainbat lekutan homofobiaren aurka egin ziren protesten epizentroa izan zen Basauriko manifestazioa. Amaierako ekitaldian, E28 Koordinakundeko kide batek hartu zuen hitza, han bildutako guztien izenean Perrinori elkartasuna adierazi eta gazteak jasandako erasoa gaitzesteko: «Erantzun egin behar dugu, eta gure gizartea leku seguruago bihurtzen lagundu behar dugu, urteko egun guztietan». Erasoa gertatu zen Bizkotxalde parkean bukatu zen manifestazioa.
Jipoia jaso eta egun gutxira, gazteak azaldu zuen ez zuela ezer askorik gogoratzen, eta, horregatik, laguntza eskatu zien jazoera lazgarri hura ikusi zuten herritar eta adinkideei: «Lurrean nengoen, ez nuen ezer ikusi. Beraz, eskatuko nieke, hemen, harmailetan zeuden gazte guztiei Ertzaintzarengana joatea eta zer pasatu zen kontatzea».
Hiru adingabe atxilotu dituzte eraso homofobo baten harira
Ertzaintzak hiru adingabe atxilotu zituen atzo, Gasteizen, beste bi gizonen aurkako eraso baten harira. 17 urtekoak dira bi atxilotu eta 16 urtekoa hirugarrena. Kolpe ugari jaso zituzten gizonezko biek, irain homofoboekin batera. Igandeko goizaldean gertatu zen erasoa, 06.00etan, Gasteizko Alde Zaharrean, Ertzaintzak jakitera eman duenez. Biktimek salatu dute ostalaritzako komertzio batetik atera, eta Aldabe zentrora iritsi zirenean, hiru gazte oldartu zitzaizkiela. Lurrera bota zituzten, eta ukabilkada eta ostikoak jaso zituzten, irain homofoboen artean. Elkarretaratzera deitu dute biharko, erasoa gaitzesteko. Andra Mari Zuriaren plazan izango da protesta, 19.00etan.
