«Europako Batasuneko Justizia Auzitegiak kontsideratu du Hungariak EBko zuzenbidea urratzen duela LGBTQI+ pertsonak baztertuz. [...] 2026an, Afrikako 33 herrialdek zigortzen dituzte sexu bereko helduen arteko harreman adostuak. [...] ILGA elkarteak egindako ikerketaren arabera, Frantzia zazpigarren postutik hamabosgarrenera jaitsi da 2022tik 2025era, berdintasun eta giza eskubideei begira». Hots, ez da kasualitatea LGTBIfobiaren Kontrako Nazioarteko Eguna existitzea: maiatzaren 17a. Hala, Ipar Euskal Herriko Les Bascos elkarteak elkarretaratzera deitu du egun horretarako: igandean, 18:00etan, Baionako herriko etxe aitzinean.
LGTBI elkarteko militantzia taldeko Franck-Yves Guilbert kideak eman du prentsaurrekoa, gaur goizean, Baionan. Iragarpen bat baino gehiago egin ditu, datorren igandeko mobilizazioak hatsarre emanen baitio Harrotasunaren Hilabeteari, Les Bascos elkarteak azken urteetan antolatzen duen LGTBI hilabeteari, hain zuzen. Nazioarteko egoera kontuan harturik —artetik eskuin muturraren ildoko jokabideak—, «munduan gertatzen denari so egiteko» eguna da, haien ustez. Egunetik hilabetera, eta hilabetetik urtera. Egitarau aberatsa antolatu dute, urteroko Miarritzeko Harrotasunaren Martxa hartzen duena.
Elkartearen izenean, LGTBI komunitatearen kontrako «herraren iraunkortasuna» azpimarratu du Guilbertek. Datu batzuk emanaz azaldu ditu bere adierazpenak: SOS Homofobia plataformaren dei zerbitzuak 1.800 lekukotasun jaso zituen iaz; Frantziako Barne Segurtasunerako Ministerioaren Estatistika Zerbitzuak 4.800 delitu zerrendatu zituen 2024an, hots, aitzineko urtean baino %5 gehiago. Zehaztekoa da, gainera, delituen datu horiek komisarietan salatuak izan diren erasoei dagozkiela eta, orduan, pentsatzekoa dela «maluruski hori baino anitzez eraso gehiago gertatu direla egiazki», Guilberten erranetan.
«Politika publikoak ez doaz aski urrun», Les Bascos elkartekoen ustez: «Bortizkeriek —fisikoek eta moralek— jarraitzen dute eskoletan, unibertsitateetan... eta horren parean, adibidez, harremanetarako sexu heziketako kurtsoak ezeztatzen dituzte».
Hilabete harro
Maiatzaren 17tik ekainaren 27ra bitarte luzatuko da Harrotasunaren Hilabetea, Ipar Euskal Herri osoan: zinema gaualdiak, kontzertuak, hitzaldiak, prebentzioa... denetarik izanen da.
Tartetik, lotu dituzte liburutegi batzuk Harrotasunaren Hilabeteari atxikimendua erakutsi eta LGBTI gaiez ari diren liburuak aitzinera eramanen dituztenak; bestalde, hainbat herriko etxek LGTBI bandera aterako dute LGTBIfobiaren Kontrako Nazioarteko Egunean.
