Sute handi bat piztu da gaur arratsaldean Imarkoainen (Nafarroa). Sutea pinudi batean hasi da; hiru gune nagusi izan ditu aktibo, eta 50 metrotik gorako sugarrak ere sortu dira. Sutea AP-15 errepidetik ikusten zen, eta errepide hori itxi egin dute 56. eta 8. kilometroen artean, bi norabideetan, badaezpada. Tren garraioa ere eten dute.
Larrialdi zerbitzuek 16:49an jaso dute abisua, eta sua piztu den gunera jo dute Cordovillako, Lizarrako, Zangozako eta Tafallako parkeetako suhiltzaileek, bi helikopterok, ura botatzeko bi hegazkinek, basozainek, udaltzainek eta foruzainek. Tokiko nekazarien traktoreen laguntzarekin aritu dira sua itzaltzeko lanetan, baina haizeak lanak zaildu dizkie. Sutea pinudi batean hasi da, eta gero labore soroetan hedatu da, AP-15 eta N-121 errepideen artean, Imarkoain eta Beriaingo industrialdearen artean.
Zona de Berian e Imarcoain pic.twitter.com/FWK2FmIydf
— AlejandroEY (@Alejandro29_48) July 5, 2026
Sutearen ondorioz geldirik egon den bakarra ez da izan AP-15 errepidea: trenen joan-etorriak ere eten dituzte Biurrungo eta Noaingo geltokien artean, eta Zaragozatik Salamancara (Espainia) zihoan ibilbide luzeko tren bat ere geldirik egon da Artederretan.
21:00 alderako kontrolpean hartu dute sua; pixkanaka zabaldu dute errepideetako zirkulazioa, eta trenak ere martxan jarri dituzte. Suhiltzaileak geldituko dira gauean eremua zaintzen, sua berriro piztu ez dadin. Herritarrei eskatu diete erretako eremuetara ez sartzeko.
