Euskal estaturi buruzkoa ez da izan asteburuan Euskal Herrian egindako galdeketa bakarra. Baztanen ere izan dute erabakitzeko aukera, izan ere, Baztango Batzar Orokorrak antolatuta Aroztegiako proiektuari buruz erabakitzeko aukera izan dute, eta erantzuna argia izan da, %27ko parte hartzearekin, hamar lagunetik zortzik ezetz esan diote megaproiektuari. Erakundeak gaur emango dio emaitzen berri Nafarroako Gobernuari.
Galdeketak EH Bilduren babesa jaso du; aldiz, aurka agertu dira hasieratik Geroa Bai, PSN edota PPN. Manu Aierdi Nafarroako Gobernuko Garapen Ekonomikoko lehendakariordeak maiatzean ohartarazia zuen "amaitua" zela kontsultak egiteko denbora. Joseba Otondo Baztango alkatea, ordea, ez dator bat Aierdirekin, eta hala erantzun dio: "Hau ez da amaitu. Baztango herritarrek argi esan dute zein den beren jarrera. Orain Gobernuak erabaki beharko du zer egiten duen".
Pozik galdeketaren emaitzarekin Aroztegia... eta gero zer? plataformako kideak ere: "Baztanek argi eta garbi erran dio ezetz Aroztegiako proiektu urbanistiko espekulatzaileari, ezetz erran dio inposizioari eta ezetz erran dio herri lurren ebaskoari".
Lekarozen luxuzko 228 etxebizitza, lau izarreko hotel bat, spa gune bat eta bederatzi zuloko golf zelai bat eraiki nahi ditu Aroztegia Jauregia SM enpresak. Hau da, egun 320 biztanle inguru dituen herri batean, 700 pertsonarentzako urbanizazioa egin nahi dute.
