Global Sumud Flotillaren azken saiakera zapuztu zuen aste hasieran Israelek: Gazan ezarritako setioa amaitzeko egitasmoaren azken ekinaldian, 50 ontzi inguru geldiarazi zituen armada sionistak, eta 428 ekintzaile gatibu hartu zituen, sei euskal herritar tartean. Bada, Israelek aske utzi ostean, Euskal Herrira iristekoak ziren gaur ekintzaile horiek: 11:10ean egin behar zieten ongietorria, Loiuko (Bizkaia) aireportuan. Hala ere, oraingoz, harrera hori bertan behera uztea erabaki du Euskal Herriko Global Sumud taldeak, sei euskal herritarretatik bi Turkian ospitaleratu behar izan dituztelako, «errepresio indar sionisten bahiketan jasandako indarkeriak eragindako lesioengatik». Beste laurek haiekin geratzea erabaki dute.
Iragan astean 50 ontzi inguru atera ziren Marmaris hiriko portutik (Turkia), Gazan ezarritako setioa amaiarazteko asmoz, baina guztiak atxiki zituzten astelehena eta asteartea bitartean. Herenegun iritsi ziren Axdod hiriko portura (Israel) atxilo hartutako zenbait ekintzaile, eta Israelgo segurtasun indarrek tratu txarrak eman zizkieten. Besteak beste, sexu jazarpena, sexu abusuak eta jipoiak salatu zituzten flotillako kideek. Atzo askatu zituzten guztiak.
