Bertan behera utzi dute gaur Lekeitioko Antzara Eguna, antzararen proba ikusten ari zen gazte bat hil baita istripuz. 20 urteko mutil bat da hildakoa, eta, Ertzaintzaren arabera, segurtasun hesi batetik amildu da. 16:00 aldera izan da ezbeharra.
Gurutze Gorriak jakinarazi du bi metro inguruko altueratik erori eta kolpe gogorra hartu duela garondoan. Konortea galduta topatu dute. Larrialdi zerbitzuak berehala joan dira istripua gertatu den tokiraino, lehendik ere anbulantzia ugari baitziren portuan, Antzara Egunerako segurtasun dispositiboaren barruan.
Ertzaintzak jendez hustu du portuaren aldeetako bat, osasun langileen lana eta anbulantzien joan-etorria errazte aldera. Han bertan artatu dute gaztea. Larrialdietako langileak gaztea suspertzen ahalegindu diren arren, bertan hil da.
Hil dela baieztatu eta minutu gutxira, Antzara Egunaren antolatzaileek erabaki dute ospakizun oro bertan behera uztea.
