Ostiraletik gauean beste lau sexu eraso salatu dituzte sanferminetan, Iruñeko Udalak jakinarazi duenez. Foruzaingoak bi gizon atxilotu ditu sexu eraso horietako birekin lotuta.
Eraso horietako bat bart goizaldean izan da, 04:45 aldera, Gaztelugibelean. Iruñeko Udalak adierazpen instituzional baten bidez gaitzetsi du erasoa, eta babesa eta elkartasuna adierazi dizkio emakumeari eta haren ingurukoei. Halaber, berriro berretsi du emakumeen aurkako indarkeria eta jarrera matxista oro arbuiatzen dituela, eta sexu erasoak desagerrarazteko, segurtasuna hobetzeko eta emakumeen askatasuna bermatzeko lanean jarraitzeko konpromisoa hartu du.
Udalak bat egingo du Iruñeko mugimendu feministak egunotan deitu dituen elkarretaratzeekin, eta herritarrak parte hartzera deitu ditu. Hain justu ere, biharko deitu du mugimendu feministak protestara, Gazteluko plazan, 21:00etan.
Maruxak
Bestalde, dozenaka pertsona batu dira gaur goizean Iruñeko Konpainia plazan, aurtengo sanferminetan gertatutako eraso LGTBIfoboak salatzeko. Stop LGTBIQ+fobia. Erasorik ez erantzunik gabe zioen pankarta bat zabaldu dute plazako agertokiaren parean.
Hain zuzen, Maruxak talde nafarrak iragan asteartean salatu zuen eraso homofobo bat jasan zutela jaien lehen egunean. Instagram bidez kontatu zutenez, bi gizonek taldeko kideei eta bertze bi laguni egin zieten eraso: «Maritxu zikinak» oihukatu zieten gaztelaniaz, eta kristalezko botilak bota.
Gisako erasoak oraindik ere gertatzen direla azpimarratu dute, eta eremu seguruak sortzea guztien esku dagoela nabarmendu.
