Espainiako Poliziak bi pertsona atxilotu ditu Gipuzkoan, eta gutxienez beste bi ikertzen ari dira Nafarroan, haur pornografia edukitzea eta banatzea egotzita. Atxilotuak haur pornografiako milaka fitxategi zituen sare bateko kideak ziren. Iturri horrek berak jakinarazi duenez, adingabeei egindako sexu eraso «larriak» agertzen ziren irudietan eta bideoetan. Hego Euskal Herrian ez ezik, Espainian ere izan dira atxiloketak, eta beste hainbat lagun ikerketapean daude: Hego Euskal Herrikoak kontuan hartuta, guztira hamasei lagun atxilotu dituzte, eta bost daude ikerketapean.
Espainiako Poliziak egin du ikerketa, nazioarteko beste polizia batzuekin batera. Ikerketa martxan jarri zuten, hain justu, Espainiako Ziberdelituen Unitate Zentrala ohartu zenean material debekatua banatzen ari zirela Peer to Peer (P2P) sare sozialen bitartez. Sare horietan, erabiltzaileak munduko edozein tokitako jendearekin jar daitezke harremanetan, eta mota askotako artxiboak bidal diezazkiokete elkarri. Espainiako Poliziak elkarlanerako deia egin du gertaera horiekin lotuta dagoen jende guztia identifikatu ahal izateko.
