Bi gizon atxilotu ditu asteburuan Udaltzaingoak Gasteizen. Haietako bat Zaramaga auzoan atxilotu zuten, igandean, 06:30 aldera. Lekuko batek Udaltzaingoari deitu zion, eta esan gizon bat lurrean zegoen emakume bat jotzen ari zela. Patruila bat bertaratu zen, eta biei adierazpenak hartu zizkien. Udaltzainek atxilotu egin zuten 40 urteko gizona, haren bikotekide ohiari mehatxuak egitea eta erasotzea egotzita.
Ordubete geroago atxilotu zuten beste gizona, 07:30ean, Arriagako Atearen kaleko ostalaritza establezimendu batean. Udaltzaingoaren patruila batek ikusi zuen segurtasun zaintzaile batek gizon bat atxikia zuela. Hark poliziei azaldu zienez, gizonak baimenik gabe ukituak egin zizkion emakume bati, eta proposamen sexualak egin zizkion lokaleko beste bezero bati. Bi emakumeen testigantzak entzun ondoren, poliziek 56 urteko gizona atxilotu zuten, sexu erasoen delitu bat egotzita.
