Ertzaintzak bi gizon atxilotu ditu Gasteizen, pertsonen legez kanpoko trafikoan aritzea egotzita. Jakinarazi duenez, A-1 autobidean egindako kontrol batean atzeman dituzte, 03:30ean; hamabost pertsona zihoazen bederatzi eserlekuko furgoneta batean, osasun egoera «kaskarrean». Ertzaintzak kontatu duenez, ibilgailuan zeuden gehienek ez zuten dokumentaziorik, eta, aurrez diru kopuru bat ordainduta, Portugalera bidean zihoazen, hara «modu irregularrean» sartzeko asmoz.
Atxilotutako bi gizonek aurrekari penalak dituzte, biek ala biek orain leporatutako delituarekin lotuta: bata, 25 urtekoa, iaz atxilotu zuen Ertzaintzak, Villabonan (Gipuzkoa), migratzaileen legez kanpoko trafikoagatik; bestea, 22 urtekoa, Atzerritarren Legea urratzeagatik atxilotu izan dute. Laster utziko dituzte epailearen esku.
