Atzo arratsaldean Bidarteko Ilbarritzeko hondartzan zebilen gizon batek aurkitu du hilotza, biluzirik, arroken artean. Egindako lehen egiaztatzeen arabera, atzemandako gorpua zenbait egunez egon da urean. Ondorioz, gorputza nahiko hondatua da, eta oraindik ez da ezagutzen gizonaren nortasuna.
Ipar Euskal Herrian ez da inor desagertu azken egunetan, Poliziak jakinarazi duenez. Gipuzkoan, ordea, Hondarribian urtarril bukaeran desagertutako gizon baten bila dabiltza. Azken asteetako aro gaizto horrekin itsasoa anitz mugitu da, eta baliteke Hondarribiko gizonaren hilotza Gipuzkoako herritik Lapurdiraino joan izana.
