Martxoaren 15ean egin zuten herriko bozen lehen itzulia Ipar Euskal Herrian. Koronabirusaren hedapenaren ondorioz, bertan behera utzi zuten hauteskunde prozesua. Lehen itzulitik bozen gehiengo osoa lortu zuten zerrenda batzuek, 142 herritan, eta, beraz, erabakita gelditu zen emaitza. Herri horietako hautetsiek maiatzaren 18an hartu zuten kargua, eta, geroztik, herri kontseilua eta auzapeza izendatzeko elkartu dira. Bihar dute azken epea herriko etxeetako karguak banatzeko. Azken egunetan, hainbat herritako kontseilu eta auzapezak ezagutarazi dituzte, hala nola Angelun, Donibane Lohizunen, Biriatun (Lapurdi) eta Donapaleun (Baxenabarre).
Gainontzeko 18 herrietan aurkeztu ziren zerrendek ez zuten gehiengo osoa lortu martxoaren 15ean. Ondorioz, bigarren itzulia egin beharko dute ekainaren 28an. Egoera sanitarioagatik, egun horretara atzeratu zuten martxoaren 22an iragan behar zen hauteskunde eguna. Birusaren hedapena murrizteko, ekaineko bigarren itzulirako neurri bereziak hartu ditu Frantziako Gobernuak. Bigarren itzuliko hautagaiek aukera daukate beste zerrenda batekin —edo gehiagorekin— batzeko. Ikusteke dago, beraz, zein izanen diren bigarren itzulira aurkeztuko diren zerrendak.
