Seigarren urteurrena du gaur Aieteko Nazioarteko Konferentziak, eta Donostiako jauregian bertan, ekitaldi bat antolatu du Foro Sozial Iraunkorrak. Bertan izan dira EAJ, EH Bildu, Ahal Dugu, ELA eta LABeko ordezkariak, besteak beste.
Azken urteetako ibilbideari errepasoa egin, eta etorkizuneko helburuen berri eman du Foro Sozial Iraunkorrak. Hiru izango dira helburuak urte politikorako, Nekane Alzeiaik eta Agus Hernanek nabarmendu dutenez: “Indarkeria mota guztietako biktima guztiekin bat” egitea, presoak, deportatuak eta iheslariak gizarteratzea eta iraganaren “irakurketa kritikoa” egitea. Lehen atala lantzeko, Foro Sozial bat egingo dute datorren urteko udaberrian.
Halaber, Brian Currin Nazioarteko Harreman Taldeko presidentea mintzatu da gaur egungo egoeraz eta iraganean gainditutako oztopoez. "Konfiantza eraikuntza izugarria" eman dela nabarmendu du, besteak beste: “Aretoan zaudetenetako batzuen arteko elkarrizketak ezinezkoak ziren, edo klandestinoak ziren”.
Aieteko nazioarteko konferentzia 2011ko urriaren 17an izan zen, eta nazioarteko sei lagun ospetsuk adierazpen bat plazaratu zuten. Hango lehen puntua betez, ETAk urriaren 20an jakinarazi zuen bukatutzat eman zuela jarduera armatua.
