Bilboko Gotzaintza 14 apaiz ikertzen ari da sexu abusuen aferarekin lotuta. Joseba Segura gotzainak eman du Bilboko Gotzaintzaren ikerketa batzordeak abiatutako ikerketaren berri. Radio Euskadi irratian eginiko elkarrizketa batean mintzatu da gaiari buruz, eta aurreratu du «kasu gehiago egongo direla», nahiz eta horietako zenbait «inoiz ez diren jakingo, biktima batzuek ez dutelako horri buruz hitz egin nahi edo galdu egin direlako».
Arartekoak gaiari buruz abiatu duen ikerketari dagokionez, Bilboko Gotzaintzako ordezkariak esan du Bilboko Elizbarrutiko kideak elkarlanean ari direla erakunde horrekin, eta helburu bat finkatu du: iritzi publikoak argi izan dezala ez dutela inongo informaziorik ezkutatu.
Beste elizbarruti batzuek ikerketa ofizial horretan izan duten lankidetzari buruz esan du haiek «autonomia dutela gehiago edo gutxiago laguntzen duten erabakitzeko», baina aitortu du inork ez duela laguntzeko oztoporik jarri.
Sexu abusuak jasan dituzten biktimei dagokienez, Gotzaintzako kideak adierazi du biktimei beren historia kontatzeko aukera eman behar zaiela, «haien egia zalantzan jarri gabe eta egia hori kontatzeko ausardia aitortuz».
