Arabako Foru Aldundiak bere gain hartuko du bazterkeria egoeran daudenen gaueko arreta. Kalean lo egiten duten etxegabeak artatzea izango da zerbitzuaren helburu nagusietako bat. Zerbitzu hori emateko, itunpeko hamalau leku lizitatu ditu aldundiak. EH Bilduren ustez, ordea, «gabezia larriak» ditu zerbitzuak. Izan ere, gizonezkoentzat soilik da, Araban emakume ugari egonagatik egoera horretan. Gainera, ordutegiak «ez dira nahikoa», koalizio abertzaleak salatu duenez.
Oraindik ez da jakina non jarriko duten aldundiaren baliabide hori. Lizitazioa, ordea, abian da, eta, beraz, eman dute baldintzen berri. EH Bilduk deritzo bereziki kezkagarria dela baliabide hori gizonezkoentzat soilik izatea, «Gasteiz izanik kalean emakume gehien duen Euskal Herriko hiriburua». EH Bilduko batzarkide Claudia Wenceslaoren arabera, ez dute ulertzen baliabide hori nola sortuko den «emakumeak baztertuta», kontuan harturik ez zegoela aurreikusita zerbitzua gizonentzat soilik izatea.
Zerbitzuaren ordutegiak ere kritikatu ditu Wenceslaok. Gaueko zortzietatik goizeko bederatzietara bitartekoa izango da. Asteburuetan, berriz, goizeko hamarretara artekoa. Ordutegi horiek «arretarik gabeko ordu tarteak» sortzen dituzte, koalizioaren arabera, ez baitatoz bat bazterkeria jasaten dutenentzako eguneko zentroaren ordutegiekin. Bestalde, ez dute aurreikusten zerbitzuan gizarte langilerik izatea.
«Gabezia» horiek konpontzeko asmoz, EH Bilduk ekinaldi bat erregistratuko du Arabako Batzar Nagusietan, zerbitzu berriak emakumeak arta ditzala bermatzeko, baita ordutegiak berrikusteko eta zerbitzuko lantaldeari gizarte langile bat gehitzeko ere. Arabako Batzar Nagusiak etenaldian dira abuztuan. Ekinaldia tramitatzeko, beraz, irailera arte itxaron beharko da, gutxienez.
