Bezperakoak baino hobeak dira COVID-19arekin lotuta Osakidetzak eta Osasunbideak plazaratutako datuak. Atzo jakinarazi zutenez, zortzi pertsonak eman zuten positibo PCR probaren bidez; azken 24 orduetan, bost izan dira: batek Bizkaian (Bilbo), beste batek Araban (Gasteiz), eta hiruk Gipuzkoan (bik Arrasaten, eta batek Donostian). Nafarroan ez dute kasurik atzeman.
Dena dela, zuhur mintzatu da Santos Indurain Nafarroako Osasun kontseilaria, eta ez «lasaitzeko» deia egin du: «Astero ari gara ikusten agerraldi berriak eta pandemiak ezartzen dituen erronka berriak». Kontseilariak nabarmendu duenez, Nafarroan, test serologikoek eta PCR probek adierazitakoa kontuan hartuta, 10.351 pertsona kutsatu ditu koronabirusak azkeneko lau hilabeteotan. «Eta, zoritxarrez, ez da bukatu. Oraindik, amaierarik ez duen bidaia bat da hau».
Eusko Jaurlaritzaren Osasun Sailak plazaratutako datuen arabera, azken 24 orduetan 2.600 pertsonari egin diete PCR proba. Hegoaldean sei pertsona daude ZIU zainketa intentsiboetako unitatean.
