Nafarroako Justizia Auzitegi Nagusiak bost urteko espetxe zigorra ezarri dio 29 urteko gizonezko bati, emakume bat bortxatzeagatik. Akusatuak ezagun zituen bai biktima eta bai haren senarra. 2022ko abenduaren 17an, dantzaleku batean izan ziren hirurak festa giroan, eta, horren ostean, gizonak etxera gonbidatu zuen bikotea. Alkoholaren ondorioz, konorterik gabe zeuden biak, hala andrea nola haren senarra, eta egoera hori baliatu zuen erasotzaileak emakumea bortxatzeko.
Auzia ikertu eta gertatutakoa frogatutzat jota, Nafarroako Probintzia Auzitegiak zazpi urteko espetxe zigorra ezarri zion akusatuari. Nafarroako Justizia Auzitegi Nagusiak berretsi du akusatua erruduna dela, baina bi urte murriztu du zigorra: zazpi urte beharrean, bost ezarri dizkio. Magistratuen arabera, Probintzia Auzitegiak «oker interpretatu» zuen Zigor Kodea, 2022ko abenduan indarrean baitzen 10/2022 Lege Organikoa, eta, hortaz, hori aplikatu beharra zuen.
Alta, lege berria aintzat hartuta ere, aplikagarria zen zazpi urteko espetxe zigorra. Zehazki, aurreko legearen arabera, sei eta hamabi urte arteko zigorra ezartzen ahal zitzaion sexu erasoagatik kondenatutako norbaiti; egungo legea eskuetan, berriz, aplikazio eremua zabalagoa da: lau eta hamabi urte bitartekoa.
Nafarroako Justizia Auzitegi Nagusiak bost urteko kartzelaldia ezarri dio akusatuari, ontzat jo baitu intoxikazio etilikoaren aringarria —aurretik, aringarri hori aintzat hartu zuen Probintzia Auzitegiak ere—. Hala ere, epaian nabarmendu dute akusatuaren jokabidea «bereziki gaitzesgarria» izan zela, eta gakoa biktimaren «onespenik eza» dela: «Aintzat hartuta biktimak orduan kontzientziarik ez zuela eta zaurgarritasun egoera erabatekoan zela, ez dago zantzu bakar bat ere esateko sexu harremanak libreak eta adostuak izan zirela».
Kartzelaldiaz gain, zenbait debeku ere ezarri dizkiote akusatuari, hala nola zazpi urtez biktimarengandik 200 metrora baino gutxiagora ezin egotea, eta espetxealdia bete ostean sei urtez zaintzapean aske egotea. 25.000 euroren kalte ordaina ere pagatu beharko dio biktimari.
