Eneko Goia Donostiako alkateak onartu du Gipuzkoako hiriburuko autobus geltokia «txiki» gelditu dela, eta, hortaz, aurreikusten du handitu egin beharko dela. Atzo egin zituen adierazpen horiek, Diario Vasco hedabideak eta Rural Kutxak antolatutako foro batean.
Datozen urteetan Donostiak izanen dituen erronkez mintzatu zen, eta hor kokatu zuen mugikortasunaren «iraultza». Are, «Topo berria eraikitzea» eta «abiadura handiko trenaren geltokiaren obrak bukatzea» nabarmendu zituen. Bestalde, onartu zuen hamar urteren ondoren autobus geltokia «txiki» gelditu dela, eta handitzea aurreikusten dutela, geltoki berrirantz. Dena dela, ez zuen ezer ziurtatu: «Adifek ez du nahi izaten bere lekuak besteekin partekatzea», erran zuen.
Etxebizitza da, Goiaren irudiko, hiriburuaren bertze erronka nagusietako bat. Esplikatu zuenez, etxebizitzaren krisiari aurre egiteko Donostiako Udalak eta inguruko herrietakoek elkarrekin lan egin behar dute.
