EITB Focusek egindako inkestaren arabera, EAJren eta EH Bilduren arteko gobernua nahi dute Araba, Bizkai eta Gipuzkoako herritarren %18,7k. EAJren eta PSE-EEren artekoa, berriz, %17,2k. Urrunago daude hirugarren eta laugarren aukerak: %5,4k EH Bilduren eta Podemosen artekoa babestu dute, eta %3,5ek EH Bilduren eta PSE-EEren artekoa nahi dute. Inkesta 1.800 pertsonari egin zaie, telefonoz, urtarrilaren 24tik 29ra bitartean.
EH Bilduko boto emaileen artean, hirutik batek babestuko luke jeltzaleekin eginiko akordio bat. Jeltzaleen boto emaileen artean, berriz, gehienek nahiago dute alderdi sozialistarekin duten koalizioa berritu –%42k–.
Langabezia, lan egoera eta soldata prekarioak dira herritarren kezka nagusiak. Galdekatutakoen %6,3k Eusko Jaurlaritzari egozten diote horren kudeaketaren erantzukizuna. EITB Focusek egindako inkestaren arabera, Eusko Jaurlaritzak egindako kudeaketari 5etik gorako nota jarri diote %84,5ek. EAJko boto emaileek 7,3ko nota jarri diote Iñigo Urkullu Eusko Jaurlaritzako lehendakariaren gobernuari. EH Bilduko boto emaileek, berriz, 5,79ko nota, eta PSE-EEko boto emaileek, 7,3koa.
Espainiako Gobernuari buruz ere galdetu dute inkestan, eta lehen aldiz gainditu egiten du, 5,3ko nota eman baitiote.
Foru aldundien eta udalen kudeaketei buruz ere galdetu dute, eta haiei jarritako nota ere plazaratu dute: galdetu duten tokietan, guztiek gainditu dute.
