EBk proposatu du Gasteizen eta Iruñearen artean ez eraikitzea AHTrik

Europa Barneko Garraio Sareak txosten batean proposatu du Gasteizen eta Iruñearen artean Abiadura Handiko Trenaren linea egin ordez oraingo ohiko trenak erabiltzea aurrerantzean ere. Kontuan hartu du ez dela aurreikusi 2030a baino lehen abiadura handiko burdinbiderik eraikitzea.

Nafarroako AHT Gelditu plataformak ohar bidez adierazi du «zartako» bat ematen diola euskal Y-a eta Zaragoza (Espainia) abiadura handiko trenez lotzeko asmoari. Plataformaren arabera, sare biak elkartuko dituen burdinbidea orain dela 11 urte eraikitzen hasi arren 30 kilometro bakarrik eraiki dituzte, Castejonen eta Iruñearen artean.

Oharrean salatu dute «mito» bat dela AHTa ia amaituta dagoela, euskal Y-a amaitzeko inbertsioaren %58 geratzen delako, eta %96 Nafarroako korridorea bukatzeko. Adierazi dute proiektuarekin jarraitzeak «baliabideak xahutzea», «lurra suntsitzea» eta «krisi ekologikoa areagotzea» eragingo duela. «Oraindik garaiz gaude Euskal Herriko elefante zuririk handiena gelditzeko», esan dute.