Mendebaldeko Europan eta Ozeano Atlantikoan hainbat denborale izan dira azken asteetan, eta horrek eragina izan du animaliengan. Horren erakusle dira joan den asteburuan Euskal Herriko hondartzetan agertu diren lanperna-musuak. Hegazti espezie berezi horren ehunka ale agertu dira, baina elkarte ekologistek adierazi dute lautik hiru hilda agertu direla. SEO Birdlife elkarteak azaldu du espezie hori izan dela neguko denborale horien biktima nagusia. Itsas Enara ornitologia elkarteak adierazi duenez, aurreko erregistroekin alderatuta, etorrera «askoz handiagoa» izan da.
Izan ere, lanperna-musu atlantikoa Ozeano Atlantiko iparraldeko espeziea da, baina neguan hegoaldera joaten da, iparraldeko hotzetik ihesi. Hala ere, ez da kostaldera gerturatzen normalean, eta itsasoan igarotzen du neguaren zatirik handiena. Udan, berriz, Eskandinaviar penintsulan, britainiar uharteetan, Frantzia iparraldean, Islandian, Errusiako penintsula batzuetan, Groenlandian eta Kanadako ekialdeko kostaldean errotzen da, eta leku horietako labarretan ugaltzen da.
[eu] Laperna-musu ugari gure kostalean. Ez ohiko kopuruak ikusi dira gaur. Batzuk hondartzetan. Bideoa Zurriolako hondartzan.
— Itsas Enara Elkartea (@ItsasEnara) February 14, 2026
[es] Gran número de frailecillos en nuestra costa. Hoy se han visto cantidades poco habituales. Algunos en las playas. Vídeo en la playa de la Zurriola. pic.twitter.com/97fJnwlySR
Bada, SEO Birdlifek azaldu duenez, azken asteotako denboraleek asko nekatzen dituzte lanperna-musu horiek, itsasoan bizi baitira neguan, eta horregatik iritsi dira kostaldera hildako horrenbeste hegazti. Hasieran, Portugal iparraldeko eta Galiziako kostaldera iritsi ziren, baina asteburuan Euskal Herriraino heldu dira. SEO Birdlifek gomendatu du ez gerturatzeko hegaztiengana, eta tokiko larrialdi zerbitzuei deitzeko.
Bizkaian, Bakioko hondartzan berrogei hegazti baino gehiago topatu zituzten, 23 hilda; Ereaga hondartzan (Getxo), 28 aurkitu dituzte, eta Gorlizen, hamabost. Egiazko kareta izeneko dortoka bat ere agertu zen Zarautzen (Gipuzkoa).
