Eibarko (Gipuzkoa) udaletxean pintaketak egin dituzte gaur goizaldean. Udalak «ekintza bandalikoa» gaitzesten duela adierazi du ohar batean. Izan ere, udalarentzat «gertaera bereziki kezkagarria» da: «Eibarko gizarteak behin betiko gainditutzat jotzen zituen garaiak ekartzen ditu gogora, seinalatzea eta intimidazioa errespetuari, bizikidetzari eta printzipio demokratikoei gailentzen saiatzen ziren garaiak».
Udalak gogorarazi du «desadostasun politikoa edozein gizarte demokratiko eta pluralen parte» dela, «eztabaida publikorako zilegizko elementua». Hori dela eta, berretsi du konprometituta daudela «Eibar beti definitu duten balioekin», hala nola «bizikidetza, errespetua, askatasuna eta aniztasuna». «Printzipio horiek ez dira bateragarriak ezein indarkeria motarekin, hertsapenarekin, ezta seinalatzeekin ere, eta udalaren jarduera gidatzen jarraituko dute», gaineratu du.
