Araba, Bizkai eta Gipuzkoan airearen kalitatea neurtzen duten estazioek informazio «faltsutua» argitaratzen dute egunero, Ekologistak Martxan-ek salatu duenez. Europako Ingurumen Agentzian kontsulta egin du talde ekologistak, eta han jakinarazi diete Eusko Jaurlaritzak erabiltzen dituen irizpideak ez datozela bat Europako indizearekin, hau da, airearen kalitatea ez dela neurtzen ari agentzia horren parametroen arabera 2019tik.
Europako Ingurumen Agentziak azaldu du 2019an neurtu beharreko bost kategoriei seigarren bat gehitu zietela eta osasunarekin lotutako mezuak ere txertatu zituztela. Ildo horretan, Ekologistak Martxan-ek zehaztu du Europako agentzia horrek ez dituela jasotzen Jaurlaritzak erabiltzen dituen kontzeptu batzuk; adibidez, kutsadura maila baxuak izendatzeko, Jaurlaritzak airearen kalitate «oso ona» erabiltzen du, baina Europan ez dago halako izendapenik. Hala, «kontzeptu azientifikoak» erabiltzea egotzi dio talde ekologistak Jaurlaritzako Ingurumen Sailburuordetzari, besteak beste, airearen kalitateari buruzko urteko txostenetan.
«Europako indizearen erabilera faltsua zuzentzeko» eskatu diete ekologistek Jaurlaritzako hainbat saili, baita Eustati ere, bertan jasotako estatistikak erabiltzen baitituzte «nazioarteko agendetan edo koiunturari buruzko txostenetan helburuak bete direla justifikatzeko».
