Alain Iriart lehendakariak osatu du Euskal Hirigune Elkargoko antolaketa berria. Apirilean izendatu zituen batzorde eragilean parte hartuko duten lehendakariorde eta gaikako kontseilari ordezkoak. Asteazken honetan, bakoitza zer sailez arduratuko den zehaztu du. 44 ordezkaritza izendatu ditu orotara, sei taldetan banatuak, eta horietarik 36tan bisaia berri bat izanen du arduradunak. Maiatzaren 20an eginen dute batzorde eragileko lehen bilkura; ekainaren 20an izanen da ondoko elkargoko biltzarra.
Euskal Elkargoko gobernantza deszentralizatzea izan zen Iriartek hautetsien aitzinean egin zuen proposamen nagusia, eta erronka horri heldu nahi dio urtea bukatu aitzin. Nicola Etxamendi Itsasuko (Lapurdi) lehen axuantari eman dio lan hori gauzatzeko ardura. Herriei eta lurralde eremuei leku handiagoa emateko asmoa agertu du, elkargoko zerbitzuak tokian-tokian antolatuta. «Igurikatze handia bada barnealdeko herrietan. Lurraldeen ahotsa entzunarazi behar dugu batzorde eragilean». Herritarren parte hartzeari ere leku berezia eman nahi dio, Garapen Kontseiluaren bidez ez ezik, lurralde eremuetan ere parte hartze hori sustatuta. «Instituzio handiak eta biztanleak elkarrengandik urrunduak dira maiz».
Horrez gain, mugaz gaindiko elkarlana indartzeko asmoa agertu du Iriartek. «Baditugu trukaketak, baina urrunago joan behar dugu». Transizio ekologikoan eta hizkuntzaren eta kulturaren arloan ikusten ditu aukerak, besteak beste. Peio Abeberri Miarritzeko hautetsiak izanen du ardura hori. Departamenduarekin eta eskualdearekin ere harremana hobetu nahi du. «Eskumen batzuk partekatuak dira; bikoizteak gelditu behar ditugu, eta elkarrekin lan egin, eraginkorragoak izateko».
Hizkuntza politikaren ardura Antton Kurutxarri Baigorriko auzapezak atxikiko du; Daniel Olzomendi Izpurako auzapezak turismoaz gain trantsizio ekologiko eta energetikoa kudeatuko du; mugikortasunaz Jean François Irigoien Donibane Lohizuneko auzapeza arduratuko da, eta hondakinen kudeaketaz Claude Olive Angelukoa; Eneko Aldana Ziburuko auzapezak uraren kudeaketa izanen du; finantza eta fiskalitatea Kotte Ezenarro Hendaiako auzapezaren esku izanen da.
Etxebizitza denentzat
Azpimarra berezia eman die lurralde antolaketari eta etxebizitzari. Joseba Erremundegi Baionako hautetsiak izanen du lur funtsei loturiko estrategia eta ekintzaren ardura; Anne-Marie Bruthek, haatik, baserri aldeko eta hiriko plangintza, eta laborantza lur eta eremu naturalen babestearena. Horri lotuak dira PLUI herri arteko tokiko hirigintza planak, besteak beste. «Herritarrek bere egiten dituzten eremuak behar dituzte, lana, aisialdiak eta zerbitzuak eskuragarri izateko». Etxamendik etxebizitzaren ardura ere izanen du sail horretan. Bizitegien Tokiko Plan berria osatu beharko dute, besteak beste.
Etxebizitza arloan orain arte hartu diren neurriak atxikitzeko borondatea agertu du lehendakariak, hala nola alokairuen mugatzea eta bizitegi turistikoen konpentsazio neurria. «Ebaluatu behar ditugu neurri horiek. Helburuak bete badira, sendotuko eta garatuko ditugu; ez badira beteak eta albo kalteak badira, berrikusiko ditugu». Betiere norabide orokorra galdu gabe: etxebizitza «iraunkor, eskuragarri eta soziala» izatea herritar ororentzat.
1970eko hamarkadako leloa gogoan Euskal Herrian ikasi eta lan egin izenpean bildu ditu ekonomia arloko sailak Iriartek. Sylvie Durruty Baionako axuantak eta Peio Etxeleku Kanboko auzapezak bikotea osatuko dute; haien esku izanen dira ekonomia eta enplegua, lan eremuak, berrikuntza eta ekonomia arduratsua, eta ekonomia zirkularra kudeatzeko saila. «Lurralde mailako politika bakarra izanen da», zehaztu du Iriartek bikote bat izendatu izanari buruz galdetu zaionean. «Lurralde eta sailen artean banatuko dute haien lana».
