Azaroaren 29ko hauteskundeetan hautu bat egingo dute herritarrek, «eskubideak zabaldu eta aurrerapen ekonomikoaren» eta «atzera egitearen eta ziurgabetasunaren» artean. Horrela ohartarazi du PSE-EEko idazkari nagusi Eneko Anduezak gaur, Gipuzkoako alderdiko arduradunekin egindako bileran. «Aurrerakada ez dago bermatua sekula: eskubideak ugaritu egin daitezke, baina atzera ere egin dezakete». Hala, azaroaren 29ko Espainiako Gorteetarako hauteskundeak eta 2027ko maiatzeko udal eta foru bozak gogoan hartuta, PSEko buruak «jokoan» zer dagoen azaldu du: «Betikoa dago jokoan: zer-nolako geroa nahi dugun pertsonentzat».
Horiek horrela, bozetan ez dira bakarrik gobernu batzuk aukeratuko, Anduezaren esanetan. «Eraldaketa handiko aldi batean bizi gara; ziurgabetasun handia dago mundu osoan, tentsio ekonomiko nabarmenak, eta erronka demografikoak ere bai. Horrek guztiak egonkortasuna eskatzen du erakundeetan, lidergo politikoa eta erantzuteko gaitasuna».
Espainiako Kongresuan, Pedro Sanchezen gobernuak etxebizitza eskubidearekin loturik aurkeztutako bi dekretuak atzera bota dituztela gogoratu du Anduezak. «Horrek erakusten du aurrerabidea ez dagoela bermaturik inoiz ere, eta gehiengoaren bizitzak hobetzen dituzten politikek babes demokratikoa behar dutela aurrera jarraitzeko».
